Te tuatuakaki no te hakari

11 Mataku roa ake ra räua ki te kitehaga atu kiäna. Käreka rä ki te tamaiti puhi ra, e nohi koa ïa ke te katakata töna. Näko mai ra kia räua : - Auraka körua e mataku kiäku, käore au e rave kiro kia körua. Hopu atu ra nä marania nei ki tähiki iho kiäna. Hakamätau atu ra räteu kia räteu. Kua horomiri te kua here nä marania nei kiäna. Kua toreu roa töna koa ke te hakapeu hoki. Ani atu ra te tamaiti puhi kia räua : - Ko vai tö körua igoa ? Nö hea mai körua ? Pähono atu ra räua ki teie tamaiti puhi : - Ko Tei-poi-te-marama ke ko Tei-poi-te-here tö mäua igoa. Nö GANAIA mai mäua, e nünaga Parata hoki mäua. Kite iho ra te tamaiti puhi ë, e haga kaito teie nau tapairu. Ani atu ra räua kiäna : - Ko vai tö u igoa. Pähono mai nei koia : - Ko Tuna töku igoa. Hogihogi iho ra räua kiäna. Ke kua vai te here ki roto kia räteu. Kua tae ki te taime e hoki ai räua, näkö atu ra : - E hoki mai mäua ke, e hoki mai ä. Käore roa ko Tuna e hinagaro kia hoki räua. Reko atu ra räua : - Ka noho iho, e hoki mai ä mäua e mätaki kia u. Hoki atu ra räua ki ruga ki tö räteu kau-tira. Hakaoe atu ra kia Mapu ki te kohipa mäere tä räua i kite. Koia hoki, teie tamaiti puhi nei ko Tuna. Ki te pogipogihaga ake, hoki atu ra räua e hipa kia Tuna ki uta ki te tahora komo. Rokohia atu e räua, të tiaki noa mai ra. Kua mirimiri ke kua hogihogi räua kiäna. Kua püai roa hoki te here ki roto kia räteu. Reko atu ra ko Tuna kia räua : - Kia hoki körua ki tö körua käega, ka poi katoga kiäku. Auraka körua e vaiho mai kiäku ki könei.

RkJQdWJsaXNoZXIy NzgwOTcw