Kua hakarare räua ki te poroki a Tuna. Kua herehere noa atu ra räua kiäna e varega-roa-hia ake ra koia ki te piko. Tupu atu ra te hinagaro ki tö räua gakau e poi katoga kia Tuna ki tö räua ra käega. Haere atu ra Tei-poi-te-marama e toki ki te kohe ëi tipi nä räua ke te raukere kape ëi pükohu. Täpü iho ra räua ki te pëpenu o Tuna ke pükohu maitaki atu ra ki roto ki te raukere kape. Ki tö räua fakaineinehaga e hoki, rave katoga mai nei ki taua pükohu ra. Të näkö mai nei teie reo : - Të hoki nei körua ki tö körua käega. Të poi katoga nei körua kiäku. Ka poi, ka poi körua kiäku ki tö körua käega. Auraka körua e rave kiro kiäku, kua here hoki au kia körua. Ëi hakakitehaga ki töku here kia körua, e hogi noa körua kiäku ki te haga taime katoga ka pau ïa uki ke ka pau ïa uki. Hititika roa ake ra räua. Kua manako hoki räua ë, kua higa ko Tuna. Rave atu ra räua ki taua pükohu nei e hoki atu ra ki ruga ki tö räteu kau-tira. Tae atu ra räua ki ruga ki te kau-tira, hakanaho maitaki atu ra ki te tahi vaihaga nö Tuna e reko atu ra kia Mapu : - Ka fano täteu ki teienei. Hakaineine atu ra ko Mapu ki tö räteu tere, e fano atu ra ki GANAIA. Ka garo ko Tahiti, ki reira räua i hakakite ai kia Mapu ki te haga tä räua i rave. Reko atu ra ko Mapu kia räua : - E aha körua ki nä reira ai ? Pähono atu ra räua : - Nö tö mäua here toreu kiäna e töna katoga hoki here kia mäua. Ke kua tika ki töna hinagaro kia nä reirahia. Reko fakahou atu ra nä tapairu nei kia Mapu : - E fakatoki mäua ki roto ki tö täteu kau-tira e pikopiko ai. 13
RkJQdWJsaXNoZXIy NzgwOTcw