15 Kua fano noa mai te kau-tira ra e piri roa mai nei ki GANAIA. Ü mai nei räteu ki teie garu toreu. Kua tikatika roa mai ki ruga te haga garu tuateteka : e kaito, e tïaki moana nö te käega o GANAIA. Kua garo roa hoki te muahaga o te kau-tira ki te rüpehu. Käore roa e viru kia könohi ki roto ki tërä garu toreu. Mataku roa ake ra ko Mapu. Hakatoki atu ra koia ki roto ki te kau-tira nö te fakaara ki teie nau marania ke reko atu ra kia räua : - Ka tika mai ki ruga, e garu toreu teie, e higa täteu. Katu mai nei räua nö te hipa ki teie garu toreu ki mua ki tö räteu kau-tira. Kua tikatika noa taua haga kaito e hitu nei : ko KAIARIKI, ko GAHAEHAU, ko TEIPUPARE, ko PUTIARE, ko HUTIA, ko MAKAKAEHAU ke ko GANAGANAIA. Reko atu ra räua kia Mapu : - Auraka e rü noa, e fakatoki mäua ki raro ake ki te takere o tö täteu kau-tira nö te vänaga atu ki tö mäua tukau Atua kia hakamatematehia mai teie garu toreu. Hakatoki atu ra räua ki raro ake ki te takere o tö räteu kau-tira nö te vänaga ki tö räua tükau Atua. Ke teie tä räua vänaga. - E tö mäua tükau Atua ë, te vänaga atu nei mäua kia u. Putu ake ko Kaiariki ki ruga te garu ki tua, te garu ki uta, te garu ki pari ki tö mäua käega ko GANAIA. E tö mäua tukau Atua ë, kia hakamatemate mai koe ki te garu, kia tae mäua, kia hö atu ki uta ki tö mäua ra käega ko GANAIA.
RkJQdWJsaXNoZXIy NzgwOTcw