19 Tüpage atu ra te kau-tira ki tua ki TEKAHORA. Hume iho ra Mapu kiäna. Türere atu ra ki roto ki te toau, ke poi atu ra e täkai ki te taura ki ruga ki te könao. Kakatihia mai nei töna hume e te kakavere, e hemokia ake ra. Topahia iho ra taua vähi nei ki te igoa ko KAKAVERE, e tae noa mai ki teie nei tau. Rave mai nei nä marania ki te pükohu i pükohuhia te pëpenu o Tuna. Hopu atu ra ki uta. Rave maitaki atu ra räua ki teie nei pükohu mai tei au ki tei porokihia. Tae atu ra räua ki uta ki te käega. Kämui mai nei te nünaga rahi tagata nö te haere mai e hakarare ki tä räua hakaoe : te huru o tö räua garohaga, te haga tä räua i poi mai, koia hoki te pëpenu o Tuna ke te poroki a Tuna kia räua. Hakaoti kämui ake ra räteu ë, ki AKIAKI, koia hoki ki TEKAHORA, e hamo ai ki te pëpenu o Tuna.
RkJQdWJsaXNoZXIy NzgwOTcw