Te parau a te mata hi’opo’a e ha’apa’o nei i te ha’api’ira’a i te mau reo e te ta’ere mä’ohi ’Ia ora na, I arata’i noa na te hïmene i te orara’a o te mä’ohi mai te tau mai ä. I roto ho’i i te mau hïmene e ’itehia ai te ’ite, te ’aravihi ’e te tura o te mau tupuna. Te tärava, te rü’äu ’e te ’ütë, te mau hïmene tumu o te fenua nei fa’aro’ohia i te mau ’öro’a rahi ato’a, täpa’o ïa nö te tura o te nuna’a, i te fa’ati’ara’a i täna mau ’ä’ai tumu, te ’ä’amu o te mau huiari’i, te ’ä’ai o te mau ’aito, te fa’atenitenira’a i te he’euri o te mau fa’a ’e o te mau tairoto. Te mau hïmene tumu o te värua ia o te nuna’a tei nati i terä ’e i terä u’i. ’Ia hono ä ’e ’ia ’atu’atuhia taua taura firi ra. Mai te ’örero tei riro ei räve’a päpü nö te höro’ara’a i te faufa’a tupuna i roto i te mau u’i, ’oia ato’a te ha’api’ira’a hïmene. Nö reira, nö te fa’ananeara’a i te ha’ap’i’ira’a o te mau reo ’e te ta’ere mä’ohi, ’ua patu mai te pü LCP a te fa’aterera’a ha’api’ira’a tuatahi ’äpitihia mai e te mau ta’atira’a nö Fanatea ’e Haururu i te tahi moiha’a nä te mau ’orometua ha’api’i ato’a pi’ihi’a : « ’A tärava, ’a rü’au, ’a ’ütë ana’e ! ’ia ’ütë te varua ! » E räve’a päpü teie nö te tauturura’a i te ’orometua i te ha’api’ira’a i te mau hïmene tumu i roto i täna piha ha’api’ira’a. I ni’a i taua rïpene uira të vai nei te mau arata’ira’a ato’a ’e te mau haruharura’a ato’a nö te tauturura’a i te titaura’a i te reo e au ia fa’a’otohia ’e tae noa atu i te mau tererara’a ha’api’ira’a ato’a. ’Ei pü’ohura’a, të ha’amäuruuru fa’ahou atu nei au i te mau ta’ata ato’a tei patu mai i teie moiha’a nö te päturura’a i te mau tamari’i i te ’apora’a i te faufa’a tupuna o tö rätou fenua. ’A tü ’ämui ana’e nö te u’i tama o te fenua nei !
RkJQdWJsaXNoZXIy NzgwOTcw