14 Ù a ona ïa i ùka aè o te tai me te tiòhi toitoi io he ava tai. Ù tahao ïa io he take tai me te tiòhi toitoi io he take tai. Ua ea mai me te ona i ùka aè o te ava tai. Ù tiòhi. Ù püina, ù mamae nui to ïa koekoe. Ù tiòhi ïa, ù tiaki ïa, ù ùmihi ïa ia Meheani tihe i te ahiahi makehukehu. Ua taa atu… Koè nui Meheani i hua mai. Me te hua atu io to âua tumu puahi i Keiaki. Ua tau ïa, pii io to âua haè me te uë i ta ïa vehine tähia nui, i kaò pü ana mai. Ua kaò Meheani. Ù vivini koè ïa i tënei hakatu hou i tihe pü ana mai i òto o to âua pohuèìa veke koè. Ua uë ïa. Ua hei koè nui to ïa maakau me to ïa koekoe. Aï… te mamae o to ïa koekoe ia maakau atu ia Meheani. Ù vevaò ïa me te èo uë : - «E Meheani e, e tu ù vehine tähia e, i hea òe ? - E Meheani e, e tu ù vehine tähia e, i hea òe ? - E Meheani e, e tu ù vehine tähia e, a hua mai ! - A hua mai ! A hua mai ! A hua mai !» Ua òko te nuiìa o te tau manu i te èo uë o Kemanuokehini ! He èo uë ! He èo mamae ! He èo hinenaò o Kemanuokehini ! He èo aukuha ia Meheani. Uëuë te tau manu ia hakaòko atu ! Paotü te tau ika io he tai, i òko i to ïa èo uë ! Uëuë te tau ika ! Paotü te tau manu-ika, i òko i te èo hinenaò o Kemanuokehini ia Meheani. Uëuë te tau manu-ika ! Ù mamae nui to te ava àki ! Ù mamae nui to te ava henua ! Ù mamae nui to te ava tai ! Paotü âtou tei taa atu : «Meheani e, i hea òe ? E Meheani e, a hua mai !»
RkJQdWJsaXNoZXIy NzgwOTcw