15 ’Ua rere ’oia nä ni’a a’e i te tai mä te hi’ohi’o maita’i nä ni’a i te moana. ’Ua tïtïaho ’oia tae roa i te höhonura’a o te moana. ’Ua mäpiha mai, e rere atu ra nä ni’a a’e i te tai. ’Ua hi’o, ’ua mä’imi ! ’Ua ’oto ’e ’ua ’oto. ’Ua mamae töna ’ä’au. ’Ua hi’o ’e ’ua tia’i... ’ua ’imi ia Meheani tae roa i te märehurehura’a. ’Ua pi’i… ’Aore reo i pähono mai. Ho’i atu ra i tö räua nohora’a i Keiaki, tau iho ra i ni’a i te tumu ahi, tomo atu ra i roto i tö räua fare. I reira töna ta’ira’a i te here i mo’e ’aro’aro. ’Ua mo’e ’o Meheani, ’e ’ua tapitapi te mana’o ’o Kemanuokehini nö teie fifi i tupu i roto i tö räua orara’a hara ’ore. ’Ua ta’i. ’Ore roa töna mana’o ’e töna ’ä’au e fa’ari’i ra i te reira. ’Auë te mäuiui o te ’ä’au ’ia ha’amana’o a’e ia Meheani. ’Ua pi’i mä te reo ’oto : - «E Meheani iti ë, e ta’u vahine here ë, tei hea ’oe ? ! - E Meheani iti ë, e ta’u vahine here ë, tei hea ’oe ? ! - E Meheani ë, e ta’u vahine here ë, ’a ho’i mai ? - ’A ho’i mai ! ’A ho’i mai ! ’A ho’i mai !» ’Ua fa’aro’o te rahira’a o te mau manu i te reo ’oto ’o Kemanuokehini ! E reo ’oto ! E reo mamae ! E reo nö te here tei mo’e. E reo ahoaho, e reo pe’ape’a. ’Oto’oto te mau manu i te fa’aro’ora’a atu iäna. Fa’aro’o te tä’ato’ara’a o te mau i’a i te pi’ira’a a Kemanuokehini. ’Oto’oto ato’a te mau i’a ! Fa’aro’o te tä’äto’ara’a o te mau manu-i’a i teie pi’ira’a. ’Oto’oto ato’a te mau manu-i’a ! Mamae rahi tö te reva ! Mamae rahi tö te fenua ! Mamae rahi tö te moana ! Rätou pauroa tei pi’i atu : «Meheani, tei hea roa ’oe ! Meheani ë, ’a ho’i mai !»
RkJQdWJsaXNoZXIy NzgwOTcw