19 I te pö mätämua, ’ore roa ’o Kemanuokehini i ta’oto noa a’e. E hina’aro rahi töna i te tä’au ia Meheani. I te ahiahi, i te topara’a o te mahana i ta’oto ai ’oia. ’Ua ’ite atu ’öna ia Meheani i roto i täna moemoeä, të rere noa ra i roto i te tahi ao ta’a’ë roa. ’Ore roa ’öna i ’ite tei hea roa terä vähi. Të rere ra, të pouanuanu ra, të tïtïaho ra ’o Meheani mä te mata ’oa’oa. ’Auë te i’ei’e ’o Meheani ë. ’Auë te nehenehe ’o täna vahine here. E moemoeä noa ho’i teie ! E moemoeä poto roa. ’Ua ara tä’ue noa ’o Kemanuokehini mai roto mai i töna moe. ’Ua ara ’e ’ua ta’i i täna vahine here. ’Ua feruri ’öna. E aha te tätarara’a höhonu o tä’u moemoeä ? Tei hea roa ’o Meheani i roto i tä’u moemoeä. E Meheani, tä’u vahine, tei hea ’oe ? Maoro i muri mai, ’ua rere ’oia nä nià a’e ia Ua Uka ! ’Ua fa’a’ati, ’ua hi’o, ’ua tïa’i, ’ua rere fa’ahou. ’Ua pö te ao ! Ho’i atu ra i te fare. ’Ua mihi noa ia Meheani. I te piti o te pö, ’ua ta’oto ’oia nö töna rohirohi rahi ! Të ’ite nei ’öna ia Meheani e rere ra, e tïtïaho ra, e ha’uti ra ’e te mau manu ! E mau manu ta’a ’ë iäna. E moemoeä ho’i teie ! E moemoeä noa. Nö töna here rahi i täna vahine i ara ai ’oia mai roto mai i töna moe ! Marere atu ra ’oia nö te ’imi ia Meheani. ’Ua pö te ao ! I te toru o te pö, ’ua ’ite fa’ahou ’oia ia Meheani i roto i te moemoeä. ’Ua horuhoru töna ’ä’au i te ’itera’a ia Meheani, mata ’oto, ’ua mo’e te hïro’a. ’Ua ’ite ’öna i te tahi manu tahu’a nui. Rürü töna tino nö te rahi o te ri’ari’a. ’Ua ara ’oia nö te mea ’ua ta’a iäna ’o vai teie manu tahu’a nui. Rahi te mäuiui o te ’ä’au i te mau höhoà o täna i ’ite i roto i töna moemoeä. E aha te tumu o teie moemoeä ? ’O täna ïa mana’ona’ora’a. I reira töna fa’aotira’a e haere roa e färerei i teie manu tahu’a nui.
RkJQdWJsaXNoZXIy NzgwOTcw