38 I te ùa o te hotu nui, ua oka i to ïa kahu toa. Ua ona i te Henua a Taha tihe atu i Hakaea. Ua tau ïa i ùka aè o te maka miò. Ua noho ïa, pii o te tau tumu èhi me te taha one. Ù tiaki ïa... Ù tiaki ïa tihe i te ava i ìte ai ïa i te tau köivi honu. Ua ea mai âtou mei io he tai. Me te tataha mai mei io he tai, tihe ma àò aè o te tau tumu èhi. I èià, ua keì âtou e tahi ùa tikitahi me te tïtïko atu i ta âtou mämäì. Ia pao te tïtikoìa, ua tomi âtou i te ùa. Ù avai atu te tau mämäì me te hua atu io he tai. Ua kau atu, ua kaò ananu… Nui, nui, nui te tau köivi honu i tihe mai, i hee atu. Ù tiòhi Kemanuokehini ia âtou. Àï te moû ! Àï to ïa mahaò ! Òa i muì iho… I ìte ai ïa i te köivi honu me te tua pupuà me he moni. He honu haatepëiù, o Akihonu te ikoa. Ua ìte Kemanuokehini i te eaìa mai o Akihonu me io he tai. No te pupuà nui o hua tua nei, ua pahu muò te tau köivi honu i to ïa tahaìa mai. Ua tihe Akihonu io te vahi i haaheiìa, i àò aè o te tumu tou. Ua keì i to ïa ùa me te tïtïko i ta ïa mämäì taetae nui. Ua tomi i te ùa me te hua atu io he tai. Ua ùku me te kaò ananu. Àï… te èkaèka ! Ù tïaki ananu Kemanuokehini tihe i te paoìa o te hana tïtïko a te tau köivi honu paotü. I te kaòìa o te tau köivi honu paotü, ua ona Kemanuokehini. Ua tau ïa pii o te ùa tomiìa o Akihonu. Ua keì me to ïa tau maikuku. Ua ìte i te mämäì. Emièe ïa i te ìteìa te mämäì ! E tahi ana iho ! E moe aa io he take ùa.
RkJQdWJsaXNoZXIy NzgwOTcw