42 Ù hiamoe Kemanuokehini, ua pö te â, ua â te pö. Ù moemoeä ïa me te ìte atu aa ia Meheani e ona aa. Aï te mahanahana o to ïa koekoe ! I to ïa vaaìa, ua ona atu ïa io he ava tai o Haaotupa no te haakoàna mai i te tau niha mea kai. Koè nui i hemo mai e tahi niha. Ù tahao ïa me te tiòhi io he tai, koè nui e ìteìa e tahi niha. Ua ùku, ua ùku, ua ùku hakaùa... I tutuki ai ïa me Akihonu, e ùmihi aa ia ïa no te töua atu, no te kukumi haamate nui. Ua ìte Akihonu i te mea na Kemanuokehini i kamo i ta ïa mämäì taetae oko. Ù popoki Akihonu ia Kemanuokehini ma he pekeheu. Ua toi atu io he take tai no te haapao nui te menava me te haamate nui atu. Ua mau Kemanuokehini ia Akihonu ma he tua pupuà. No te amo mai io he tuaivi. E tià e papae nui te köivi honu, me te kukumi atu haamate nui. Totoi atu, totoi mai ! Òomi atu, òomi mai ! Tito atu, tito mai ! Popoki atu, popoki mai ! Amo atu, amo mai ! Totohua âua ! Totohua te tai ! I te òaìa, ù popoki Kemanuokehini ia Akihonu ma he tua pupuà me te ona ! E ona aa ïa, e keu aa Àkihonu me te topa. Ua topa atu io he tahuna o Haaotupa ! Täìa te tua pupuà io he hoohoo keâ. Mamae nui te tua o Akihonu. Ua ona mai Kemanuokehini, ù popoki ia Akihonu me te ona atu. E ona aa ïa, e keue aa Akihonu me te topa. Ua topa atu io te kaavai o Vaiohe. Ua täìa hakaùa te tua pupuà io he makamaka hau... Ua too hakaùa Kemanuokehini ia Akihonu me te ona. Ua ona atu tihe i Teavanui. I èià, ù avai Kemanuokehini ia Akihonu io he tohua èpo. Ù tiòhi atu, ù tiòhi mai. Ù pähaka mai Kemanuokehini i te haka toa. Ù haakevaì ïa i to ïa nino me keuìa tai. Ua tü ïa me he àke… Ua àke te kaù tai. Ù haatata ïa me Akihonu me te tä atu io he upoko… MU !... Ù pakakina te täìa ! Ù avai ïa ia Akihonu me te ona atu i Keiaki. Ua tau io to ïa tumu puahi me te moe. Koè nui Akihonu i pohuè aè. Ua moe ananu ïa io he kapua. Pëpë nui to ïa nino. Ù papae nui te köivi honu. Ua veà nui ïa i te ôumati me te mate nui. Ua mate nui ïa i Muake. Ua hua mai te tau toka niha, ua kai Kemanuokehini no te haaheòheò atu i te nino. Ù haatutuki ïa me Manupeke no te tekao atu i ta ïa hana. Ù tekao mai Manupeke i te toù o te àkoìa e hana mai.
RkJQdWJsaXNoZXIy NzgwOTcw