KEMANUOKEHINI

’Ua ta’oto ’o Kemanuokehini, ’ua pö te ao, ’ua ao te pö. I roto i töna moemoeä, të ’ite nei ’öna ia Meheani i te rere-noa-ra’a. ’Auë ho’i te mähanahana o te ’ä’au. I töna arara’a mai, ’ua rere atu ’oia nä tai atu i te fa’a o Haaotupa nö te haru mai i te i’a ’ei mä’a näna. ’Aore i’a i noa’a mai iäna. ’Ua rere, ’ua tütonu, ’ua ’imi, ’aore i’a i ’itehia e ana. ’Ua hopu, ’ua hopu, e ’ua hopu fa’ahou… ’Ua färerei ’oia ia Akihonu, të ’imi ra iäna nö te ’aro, nö te taparahi ha’apohe roa iäna. Nö te mea, ’ua ’ite ’ona ë, nä Kemanuokehini i ’eiä i töna huero i poihere-rahi-hia e ana. Haru a’e ra ’o Akihonu ia Kemanuokehini ma töna nä pererau. Huti atu ra i roto i te höhonu nö te ha’aparemo, ha’apohe roa iäna. ’Ua haru ’o Kemanuokehini i te paraha ’ana’ana ’o Akihonu nö te amo, ’äfa’i roa iäna i ni’a i te mou’a. Penei a’e, i reira ’öna e paruparu ai, ’öhie ïa nö te taparahi ha’apohe roa iäna. Huhuti atu, huhuti mai ! Täumi atu, täumi mai ! Tito atu, tito mai ! Haru atu, haru mai ! Amo atu, amo mai ! ’Ua ’ï räua i te toto, ’ua totohia te tai ! Maoro i muri iho, ’ua haru ’o Kemanuokehni i te paraha ’o Akihonu e rere atu ra. Të rere nei ’oia, të hä’uti’uti noa ra ’o Akihonu, e topa atu ra. ’Ua topa ’oia i ni’a i te ’iri’iri e vai ra i tahatai i te fa’a o Haaotupa ! Topa tä’iri töna tua i ni’a i te tahi ’öfa’i. ’Ua mäuiui roa ’oia. ’Ua haru fa’ahou ’o Kemanuokehini ia Akihonu e rere atu ra. Të rere ra, të rere ra, të hä’uti’uti noa ra ’o Akihonu, e topa fa’ahou iho ra. ’Ua topa i roto i te fa’a ’o Vaiohe. Topa i ni’a i te ’äma’a fau. Nö te toru o te taime, ’ua haru fa’ahou ’o Kemanuokehini ia Akihonu. ’Ua rere ’e ’ua tae roa i Teavanui. I reira, ’ua vaiiho ia Akihonu i ni’a i te tahua repo. Hi’o atu, hi’o mai. ’Ori atu ra ’o Kemanuokehini i te ’ori a te toa. ’Ua fa’aha’uti ’oia i töna tino ’ia au i te ’are miti, mai te hö’ë ’are miti e fati ra… Fati iho ra i ni’a ia Akihonu mai te tüpa’i i töna upo’o… MU !... Fa’aro’omaita’i-hia te pa’a’ina. Vaiiho iho ra ’oia ia Akihonu e rere atu ra i Keiaki. Tau iho ra i ni’a i täna tumu ahi e ta’oto atu ra. Aita roa atu ’o Akihonu i ora mai. ’Ua tärava noa töna tino i ni’a i te ’äivi. Pëpë ’ino roa töna tino. ’Ua pa’apa’a ’oia i te mahana ë pohe roa atu ra. I Muake ’oia. ’Ua ho’i mai te ’äere i’a, ’ua ’amu ’o Kemanuokehini i teie mau i’a nö te fa’aitoito i töna tino. ’Ua färerei ’oia ia Manupeke nö te fa’aara i te ’ohipa i ravehia e ana. I reira to Manupeke fa’a’itera’a atu iäna i te toru o te ’öpuara’a. 43

RkJQdWJsaXNoZXIy NzgwOTcw