57 ’Ua ’ori mai räua i tä räua ’ori, e ’ori nö te here, mai te huru atu ra e mahana fa’aipoipora’a terä. ’Ua ’oa’oa pauroa te manu i te ho’ira’a mai ’o Meheani. ’Ua ’ori mai te mau i’a i tä rätou ’ori, i roto i te tai. Nä reira ato’a te mau manu nö Havaiiki Nui. I te ahiahi, ’ua tau räua i ni’a iho i te tumu ahi i Keiaki. Herehere iho ra räua i terä ra pö. E pö terä i färerei fa’ahou ai räua. I terä ra pö, nä’ö atu ra ’o Meheani ia Kemanuokehini : «’Ananahi, e fa’aineine mai ’oe i te ’öfa’ara’a nö tä täua huero. Nä ’oe e fa’ata’oto, nä’u e fa’atäma’a ia ’örua.» ’Ia po’ipo’i a’e, ’ua hämani ’o Kemanuokehini i te ’öfa’ara’a. I te otira’a, ’ua tïa’i ’o Meheani i te pö urirui no te tu’u atu i te huero i roto. ’Ua fa’ata’oto ’o Kemanuokehini i teie huero, e toru pö, e toru ao ë, pata mai nei te hö’ë fanau’a. ’Aita töna e huruhuru, e ’ere ato’a i te mea päutuutu maita’i. I te tupura’a te huruhuru, e huruhuru ’ere’ere ïa ’e te huruhuru tea ato’a. I töna pa’arira’a mai, ’ana’ana maita’i töna huruhuru. E manu ufa, ’o Mehetai te i’oa. ’Ua ha’api’i ’o Kemanuokehini ia Mehetai i te rere, i te mau ’ite ato’a nö te ra’i, ’aore ra nö te fenua. ’Ua ha’api’i ato’a ’o Meheani i töna tamähine i te hopu i te höhonura’a o te moana. I te tahi mahana, të hahaere noa ra ’o Kemanuokehini, Meheani ’e ’o Mehetai. Të haere ra e ’imi i te mä’a nä rätou, i mua noa a’e ia Motumano. Të rere ra, të hopu ra, të ’amu ra, të ha’uti ra, të ’ori ra ! I reira tö rätou ’itera’a i te tahi manu të rere noa ra. ’Ua piri mai ia rätou. Të pi’i ra, e ta’ira’a reo ’oa’oa. ’Ua ta’a ia Kemanuokehini ’o vai teie manu e rere ra, o vai teie manu e ha’afätata mai ra. ’O Matuhonu teie manu.
RkJQdWJsaXNoZXIy NzgwOTcw