7 E fa’ahiahia rahi tö te mau manu ’ia ’ite atu ia Kemanuokehini i te rerenoa-ra’a nä te reva. Të rere ra, të tïtäpou ra, të fa’a’ohu ra, të fa’a’opa ra. Të fa’a’opa ra i te pae ’aui, ’e i te pae ’atau. Të rere ra, të hi’o ra, të fa’a’ohu ra nä ni’a noa mai i täna i here. Të rere ra, të pouanuanu ra i roto i te miti. Të rere mai ra, tau atu ra i ni’a i te ’öutu, i ni’a i te tumu rä’au, i ni’a i te miti, i ni’a i te one. Të ’ori ra, të haatärava ra. Të ’ori ra, të haatärava ra, të ’ori ra ’o Kemanuokehini i te ’ori o te here. Të ’ori ra i te ’ori o te here, ’oia ho’i të fa’ahina’aro nei ’oia i te purotu. Rahi töna fa’ahina’aro, rahi töna fa’ahina’aro i te purotu ra. Fa’ahina’aro rahi… hina’aro rahi… na’aro rahi… Të fa’ahina’aro ra. ’O vai ho’i te purotu ? ’O vai ho’i te purotu i rotopü i te mau manu ufa ato’a ? E ’uriri, e ari’i vahine ’e te häviti ato’a, te häviti ’aita atu ai. Töna huruhuru, e huruhuru tea, tea ’ana’ana maita’i. E manu ’oia nö te tai, e manu pouanuanu, e manu tïtïaho, tïtïaho i raro, i raro roa i te moana. E te’ote’ora’a näna i te tïtïaho i raro roa i te moana. ’O Meheani te purotu o te mau manu ato’a. Të hi’o mäere noa ra te mau manu ato’a ia Meheani e rere ra nä te ara. I töna pae, të tïtïaho ra ’o Kemanuokehini, ’öna anä’e, i töna pae. Të rere ra, të haro ra, të fa’a’opa ra, mai te huru ra, tei te reva ’oia. Të mäpiha mai ra mai roto mai i te moana, e rere atu ai nö te horo’a i te i’a nä Kemanuokehini. Të ’ori ra ’o Meheani i te ’ori o te here. Të fa’ahina’aro ra, e rere fa’ahina’aro terä. ’Ua fa’ahina’aro mau ä ’öna ia Kemanuokehini. Fa’ahina’aro rahi… hina’aro rahi… na’aro rahi… Auë ho’i ë… te nehenehe ’ia hi’ohia atu ia räua e ’ori ra nä te reva. Fa’ahiahia rahi tö te mau manu. E ’öro’a, e ’öro’a, e ’öro’a fa’aipoipora’a. Të ’öri ra räua i te ’ori fa’ai’ei’e. Të rere ra ’o Kemanuokehini nä te reva. Të tïtïaho ra ’o Meheani i raro i te moana. Räua to’opiti terä e rere ra. Räua to’opiti terä e tïtïaho ra. E ’ori fa’ahina’arora’a, e ’öro’a fa’aipoipora’a. Të fa’a’ite ra räua i tö räua here…
RkJQdWJsaXNoZXIy NzgwOTcw